Genesis 13
THAUREYMEI 13
Abram khatni Lot Ntamvmei
1 Abram Kanow ta nduanghna kapuat kachei kaguayna phungcna Izip khou rui Kanaan Negeb ramv khou ngangh dat the. Lot ni kathei lay tat bam khwan e.
2 Abram tei lauziu, ziuh, guaih bangh, khatni daandi kachaekc mpeyna nai khwan e.
3 Abram Negeb khou rui tat thau datna Bethel nganv ngangh the, thaurey khou Bethel lev Ai kaney kak khou zypui kai katinghloumei bamv
4 khatni ravchabamv kasiamh thauna Ringhpouc zanc saancna kalumrey kanmei bamv e.
5 Lot ni katuang lauziu, ziuh, guaih bangh, kakai kaikhunc khatni kabangc nunc nai geic khwan e.
6 Kumna kaney tuang kiruai guay tei geic langvna kataek mpacloumei bamv khang maek khe.
7 Kumna Abram lev Lot tuang kiruai gaenghmei nunc tei agay the. (Mi douc tei Kanaanmei lev Perizimei mi kandic khou tei lungc bam khwan e.)
8 Abram rui Lot khou sa the, “Kaikhunh akhat namei swna nang lev anei kak khou khatni nang tuang mei nunc lev amei nunc kak khou agi agay bam nuh mak ge.
9 Kumhpui zaeng rui anei bam ntamv di kho. Nang rui kahaw hawmei ramv tei kapah do. Nang baanzat thangc tat kan e thei ai baandau thangc tat kan puni, nang baandau thangc tat kan e thei ai baanzat thangc tat kan puni.”
10 Lot tei zauc kari-kariangna zauc pwki Jordan nzaengc kapwm, Zoar tanghmei nganvna Ringhpouc tuang pikwan kumc, Izip kandic kumc dui gay the twmei how the. (Mi hei Ringhpouc rui Sodom lev Gomora ta swmaan mak khou e.)
11 Kumna Lot rui Jordan nzaengc kapwm kakhang kapah the kumna mi neihpat biak thangc tei kamei tat kan the. Hei tei kumcna kaney lungc ntamv the.
12 Abram rui Kanaan kandic khou bam duc the, Lot rui nzaengc khou kaidai pang naimei bamv khou Sodom daeng khou lungc the.
13 Sodommei nunc tei meicgay makmei khatni Ringhpouc hu khou paapc geicna taanc bammei nunc khwan e.
Abram Hebron thangc Kalaic Tatmei
14 Lot tat kanmei tangv, Ringhpouc rui Abram khou sa e, “Nang bammei bamv khou tei rui dihpy dihba, neihpat neihkey zaucmincna zauc o.
15 Nang rui howmei ramv guay hei nang khang khatni nang kikta khang tii puni, kumna mi hei tingsaengzaeng nangniw tuang sw puni the.
16 Ai rui nang kikta ta tei kandih taniang thw zu tigeiclou puni the, kumna kandih taniang thw sing chak ngam lakmei kumc nang kikta sing chak ngam pu lak khe.
17 Tatna ramv kapwmna tei zauc tho, mi kaguayna hei nang khang tii puni the.”
18 Kumna Abram rui lunghbamv kalaicna Hebron ramv khou Mamre twna kawmeipu tuang mphauhbang ding daeng khou guang lungc the. Hei khou tei kamei rui Ringhpouc ta kalum khang ravchabamv kasiamhlou the.
Genesis 12
THAUREYMEI 12
Ravguangc rui Abram ta Kawmei
1 Ringhpouc rui Abram khou sa the, “Nang kandic, nang riang nang luaic khatni nang pu kai ta ganclouna ai rui nang khou lyanlou pw nimei kandic thangc tat tho.
2 Ai rui nang kikta tikingc nkiuclou puni the, kaniw tei zaatc daihmei sw puni the. Nang hei suaihiam sw diu khang ai rui nang ta suaihiamlou puni the khatni nang zanc tidaiclou puni the.
3 Nang ta suaihiamloumei nunc ta tei ai rui ni suaihiamlou puni,
nang ta siangloumei nunc ta tei ai rui ni sianglou puni,
khatni nang paan rui kandihmei zaat, kaikhunh kaguayna ta
ai rui suaihiamlou puni.”
4 Abram katingkwm 75 tanghmei kwm, Ravguangc rui saloumei theilayna kamei Haran khou rui tatpat the; kumna Lot ni kathei lay tat khwan e.
5 Abram rui kanow Sarai khatni kasuangc alaumei nac Lot ta nduanghna Haran khou rui lungc patmei kasyan kalanv, khatni katy kabangc guay ta phungcna Kanaan kandic nzwan khang tatpat the.
6 Abram tei Kanaan kandic guang tangcna, Sekem ramv khou naimei More kawmei bamv khou thingbang daihmei khou tei guang tangh mak saanv Kanaan kandic tei tat ruan key the. Mi douc mi kandic khou tei Kanaanmei nunc lungc bam khwan e,
7 Ringhpouc kamei Abram khou guangna sa the, “Ai rui nangkik nangta khang tii punimei kandic kiu mi hei the.” Khoutei kakhou guangna lyanloumei Ringhpouc ta kalum khang hei bamv khou tei Abram rui ravchabamv kasiamh the.
8 Hei tangv tei kamei dihba biak thangc keyna Bethel kaidai tuang neihpat biak thangc naimei chyngramv khou zypui pheykai katinghlou the. Hei tei neihkey biak thangc Bethel khatni neihpat biak thangc Ai kaidai kaney kak khou e. Hei khou tei ni kamei rui ravchabamv kasiamh thauna Ringhpouc ta kalum the.
9 Hei tangv tei kamei rui kabamv kalaic kalaicna tatna Kanaan tuang dihba biak thangc tat key the.
Abram Izip Thangc Keymei
10 Kanaan kandic khou tei nap nkowmei guang khwan e. Kumna mi kandic khou tei nap nkowmei tei ranv langv tina Abram tei matat khat lungc khanvlou khang Izip khou key the.
11 Kamei Izip guang tangc zaic ni khou kamei rui kanow Sarai khou sa the, “Nang hei meiclwn meicchav gaymeipui e.
12 Izipmei nunc rui nang ta how pwkhou nang hei anow e twna ning e thei kaniw rui ata swluai kan puni e, kumna nang rana ringc bam duc puni e.
13 Nang hei atanpui de twna kaniw khou sa o; kum ti thei nang zaeng rui kaniw rui ata mpatlou puni khatni ata kungcna swlou puni e.”
14 Abram tei Izip khou gut the kumna Sarai tei lwnchav gay e twmei Izipmei nunc rui how the.
15 Guangh kai tuang meicdaihmei nunc rui kata how lana kamei kalwn kachav adih gay cho twmei guangh khou raclou tina kata guangh kai thangc nduangh tat kan the.
16 Kumna kazaeng rui guangh rui Abram khang swchuyna swlouna kakhang lauziu khatni ziuh, kuanniam, guaikuan khatni banghpui banghpu mpeyna tii the.
17 Guangh tei rui Sarai ta laa mei zaeng rui, Ringhpouc rui kakhou akhatni guangh kai khou bammei nunc khou tei si sihmei ravpyan tiguang the.
18 Kum tina guangh tei rui Abram ta kaw guangna sa the, “Nang rui akhou swlou bammei hei tabui tuang cho? Kamei hei nang now de twna tabui swna nang akhou sa mak tu cho?
19 Tabui swna kata nang tanpui de twna sana ata tikaw bam tu cho? Nang now ta nduangh tat dat tho!”
20 Guangh rui kamei nunc khou latdanv tii tina kaniw rui Abram tei kanow ta nduanghna katuang puat guay phungcna tat dat kan khang thouc ganclou kan the.
Genesis 11
THAUREYMEI
Babel khou Ting-nravmei
1 Thaurey khou kandih kapwm khou lat akhat na sa bam khwan e.
2 Kaniw rui neihpat biak thangc rui kalaic guangna Sinar twna kawmei ramv nzaengc baek khou lungc the.
3 Kaniw khat khat khou kumna sa the, “Guang tho! Aniu taniangtauc ntei di kho.” Kaniw rui ntauh phaan taniangtauc khatni ntauh-tamc phaan khi rui piu the.
4 Kaniw rui sa the, “Guang tho, aniu kaidai akhat kasiamh di kho, khatni kai kauhmei katwan tingpuk twng tanghmei akhat kasiamh di kho, kumna aniu zanc titat di kho, kum mak ge thei aniu hei kandih pwm khou zinlik tat kan puni the.”
5 Mi kaidai tei khatni mi khou bammei nunc tei rui sw bammei kauhmei kai tei zauh khang Ringhpouc key the.
6 Kamei rui kumna sa the, “Zauc lo, kaniw hei zaatc akhat na, lat akhat na re; kaniw rui taancpw nimei taanv hei thu ntaw thu kahouhmei di he; kaniw rui taanc nii niimei tei taanc ngam lakpui tuang nai dat pu lak khe.
7 Kaniw akhat khat lat thay mak khang aniu keyna kaniw lat tikaguakclou di kho.”
8 Kumna Ringhpouc rui kaniw ta kandih kapwm khou zinphaklou the, kum tina kaniw mi kaidai raanvthaumei taanv tei taanc nthaekc the.
9 Kumna mi kaidai zanc tei Babel twna kaw the, kalam thu Ringhpouc rui hei khou tei rui lat tibaiclou the khatni kaniw ta kandih kapwm khou zinphaklou the.
Shem Kikta
(1 Kinchakh 1.24-27)
10 Mi hei Shem kikta nunc the. Duidai tangv tingkwm kaneimei khou, Shem katingkwm 100 tangc pwkhou kanac mpouh gaanv khat Arpaksad puanc e.
11 Mi tangv tei kamei tingkwm 500 lungclou datna mpouh aluh baih baihmei ni puanclou e.
12 Arpaksad katingkwm 35 khou nah mpouh gaanv khat, Shela ta puanclou e;
13 mi tangv tei kamei tingkwm 403 lungclou datna mpouh aluh baih baihmei ni puanclou e.
14 Shela katingkwm 30 khou kamei nah mpouh gaanv khat, Eber ta puanclou e;
15 mi tangv tei kamei tingkwm 403 lungclou datna mpouh aluh baih baihmei ni puanclou e.
16 Eber katingkwm 34 khou nah mpouh gaanv khat, Pelek ta puanclou e;
17 mi tangv tei kamei tingkwm 430 lungclou datna mpouh aluh baih baihmei ni puanclou e.
18 Pelek katingkwm 30 khou kanac mpouh gaanv khat, Reu ta puanclou e;
19 mi tangv tei kamei tingkwm 209 lungclou datna mpouh aluh baih baihmei ni puanclou e.
20 Reu katingkwm 32 khou kanac mpouh gaanv khat, Seruk ta puanclou e;
21 Mi tangv tei kamei tingkwm 207 lungclou datna kanac mpouh aluh baih baihmei ni puanclou e.
22 Seruk katingkwm 30 khou kanac mpouh gaanv khat, Nahor ta puanclou e;
23 mi tangv tei kamei tingkwm 200 lungclou datna kanac mpouh aluh baih baihmei ni puanclou e.
24 Nahor katingkwm 29 khou kanac mpouh gaanv khat, Tera ta puanclou e;
25 mi tangv tei kamei tingkwm 119 lungclou datna kanac mpouh aluh baih baihmei ni puanclou dat re.
26 Tera katingkwm 70 tangv Abram, Nahor, khatni Haran ta puanclou e.
Tera Kikta
27 Mi hei Abram, Nahor khatni Haran ta puanhmei Tera kikta the. Haran hei Lot pu e.
28 Haran hei kapu Tera ringc bam khou kamei lungc bammei Kaldimei kaidai Ur khou theiclou the.
29 Abram lev Nahor tei kaney now kaw the; Abram now zanc rui Sarai khatni Nahor now zanc rui Milka e. Kamei hei Haran nac aluhpui e. Haran rui Milka khatni Iska ta puanclou e.
30 Sarai tei nakamcpeic khwan e.
31 Tera rui kanac Abram, Kamauc Sarai, khatni Haran rui puanhmei katou Lot kaniw ta nduanghna Kanaan kandic thangc tat khang Kaldimei tuang kaidai Ur khou rui tatpat the. Kaniw Haran twna kawmei bamv tat tangcna khou tei kaniw lungc the.
32 Tera katingkwm 205 tangcna Haran khou tei theiclou the.
Genesis 10
THAUREYMEI 10
Nouha Nac nunc Kikta
(1 Kinchakh 1.5-23)
1 Mi hei Nouha nac nunc, Shem, Hem khatni Japhet tuang kikta nunc the. Duidai tangv rui kaniw nac mpouh nunc puanc khwan e.
2 Japhet nac mpouh nunc: Gomer, Magok, Madai, Javan, Tubal, Mesek khatni Tiras hei nunc hei e.
3 Gomer khou rui lungc patmei nunc rui Ashkenazmei, Riphatmei khatni Togarmamei nunc hei e.
4 Javan khou rui lungc patmei nunc rui Elishamei, Tarshismei, Kittimmei khatni Rodanimmei e.
5 Kaniw hei duipui paengc khou khatni duipui pukak khou lungc bammei nunc pupouc e. Mi nunc hei Japhet khou rui lungc guangmei khwang baihmei swna kandih baih baih khou lungcna khatni kalat baicna sa bammei zaatc nunc the.
6 Hem nac nunc rui; Kus, Mizraim, Put, khatni Kanaan hei nunc hei the. Kaniw hei mi zanc phuakh phungc bammei zaat nunc tuang pupouc nunc the.
7 Kus kikta hei Sebamei, Havilamei, Saptamei Raamamei khatni Saptekamei e. Raama kikta rui Sheba lev Dedanmei e.
8 Kus nac mpouh Nimrod twmeipu akhat nai khwan e. Kamei hei kandih nam ruc khou rey liangmei baantanc rihliangmeipu khwan e.
9 Ringhpouc paan rui kamei hei maru-makhammeipu khwan e, kum tina “Nimrod ta kumc Ringhpouc rui nang ta khouringh khounah laa geihmeipu tiswlou pu di tho,” twna meic nunc rui sa bammei tuang e.
10 Thaurey khou kaguanghdic hei Babilon, Erek khatni Akkat kandic hei khwan e, mi kandic kathumh hei Babilon khou rana de.
11 Kamei mi kandic khou tei rui Asiria khou guangna Nineve, Rehobot Ir, Kala
12 khatni kai daihmei Resen tei kasiamh thau khwan e. Resen hei Nineve lev Kala kak khou naimei kaidai e.
13 Mizraim kikta rui Lidiamei, Anamimei, Lehabmei, Naphtumei,
14 Pathrusmei, Kaslumei khatni Kaphtormei hei nunc hei e. Kaslumei khou rui Philistinmei hei lungc guangmei tuang e.
15 Kanaan rui kanac nareimei Sidon khatni Het ta puanclou e.
16 Kanaan khou rui Jebusimei, Amormei, Girgasmei,
17 Hivimei, Arkamei, Sinmei,
18 Arvadmei, Zemarmei, Hamatmei ni lungc pat khwan e. Kanaanmei kaikhwang guay hei lungc phak pat khwan the,
19 kumna kaniw ramv tei dihba biak thangc Sidon khou rui Gaza daeng khou naimei Gerar nganv, khatni neihpat biak thangc rui Sodom, Gomora, Adma, Lasa daeng khou naimei Zeboam nganv khwan e.
20 Mi nunc hei Hem khou rui lungc guangmei zaatc baic baicna kandih baih baih khou lungcna kalat kalat baic baicna sa bammei nunc the.
21 Japhet chaic Shem hei Eber nac nunc guay na tuang kapu kapouc the,
22 Shem nac nunc; Elam, Asur, Arpaksad, Lud khatni Aram hei mi zanc phuakh phunghmei zaat nunc tuang pupouc nunc the.
23 Aram kikta hei Uzmei, Hulmei, Gethermei khatni Mesekmei the.
24 Arpaksad hei Shela pu e, Shela hei Eber pu e.
25 Eber kanac mpouh gaanv nei puanc e: gaanv khat rui Pelek twna kaw e, kalam thu kakin khou kandihmei maansei nunc hei phak pat kan the; gaanv khat pu zanc rui Joktan twna kaw e.
26 Joktan kikta hei Almodadmei, Selepmei, Hazarmavetmei, Jeramei,
27 Hadorammei, Uzalmei, Diklamei,
28 Obalmei, Abimaelmei, Sebamei,
29 Ophirmei, Havilamei khatni Jobapmei e. Kaniw kaguayna hei Joktan khou rui lungc guangmei nunc e.
30 Kaniw lunghmei kandic hei neihpat chyngramv Mesa khou rui Sephar nganv e.
31 Mi nunc hei Shem khou rui lungc guangmei khwang nunc zaatc baih baihmei swna kandih baih baih khou lungcna kalat kalat baic baicna sa bammei nunc the.
32 Hei guay hei Nouha khou rui lungc guangmei, kaniw lungc keymei riang theilayna zaatc baic baicna lungc pat kanmei nunc kiu the. Duidai tangv kandihmei maansei guay hei Nouha nac nunc khou rui lungc guang datmei tuang the.
Genesis 9
THAUREYMEI 9
Ravguangc rui Nouha lev Latdyng Swmei
1 Ravguangc rui Nouha khatni kanac nunc ta kumna suaihiamlou the, “Nang kikta rui kandih lungc padik khang nangtu nangna puan kingc kiucna lungc tho.
2 Khouringh khounah, nruay thauruay, khav ga rui nang ta pingna lungc puni the. Mi guay tei nang bangc khou lou the.
3 Nang rui mi guay tei khatni thingnuy paannu guay tu nuh the; mi guay tei nang taektw khang tiilou the.
4 Nang rui tu lak nimei akhat kiu thu zei naimei zanc tei tu lak nina e. Mi hei tu nuh mak ge kalam thu ringhmei hei zei khou tei nai e.
5 Thowkumhmei rui maansei panty swmaan e thei, kata dandi tii puni. Maansei ta swluaimei khouringc ta tei theihmei dandi tii puni.
6 Maansei ti hei Ravguangc ta luicna damclou the, kumhpui zaeng rui maansei akhat ta swluaipui mei ta tei maansei rui swluai dat puni e.
7 “Nang kikta rui kandih kapwm lungc padik khang nang kikta kingc kiucna lungc pat tho.”
8 Ravguangc rui Nouha lev kanac nunc khou sa e,
9 “Ntaw thu ai rui nang khatni nang kikta khou latdyng ding the,
10 mi hei kalung parik kaguayna nruay thauruay guay khatni khouringh khounah guay hidai khou rui pat datmei katana khang tei e.
11 Heikumna ai rui nangniw khou latdyng ding the: duidai rui kalung parik kaguayna ta swmaan dat lak khe; duidai rui kandih ta swmut dat lak khe.
12 Ai rui nang khatni kalung parik katana khou swloumei tingsaeng latdyng tuang madanhmei swna,
13 ai rui muangh khou alatdyng tiilou the. Mi hei ai rui kandih khou swloumei alatdyng tuang madanhmei swna bam puni the.
14 Ai rui tingpuk hei muangh rui gumbinlouna muangsingc pat pwkhou
15 kalung parik kaguayna ta duidai rui swmaan dat lak khe twna dingloumei alatdyng tei ai ningtow puni e.
16 Muangh khou muangsingc patmei kathuic ai hei tei zaucna ai lev kandih khou naimei kalung parik kak khou swlou kanmei tingsaengzaeng tuang latdyng tei ningtow bam puni e.
17 Ravguangc rui Nouha khou sa the, hei tei ai rui kalung parik kaguayna khou swlou kanmei latdyng tuang madanhmei sw puni the.”
Nouha lev Kanac nunc
18 Nouha nac mpouh nunc hidai khou tei rui pat datmei tei Shem, Hem, khatni Japhet hei nunc hei the. (Hem hei Kanaan pu e).
19 Kandih khou lungc bammei maansei zaatc katana hei mi Nouha nac gaanv thumh khou rui lungcpatmei tuang the.
20 Lautaanhmeipu Nouha tei drakhalau taanc rey liangmeipu e.
21 Kamei drakha zouc zangv mba the kumna kaphey kabaan piu makna pheykai lungc khou pumtang aliau bam khwan e.
22 Kanaan pu, Hem rui kapu paliuc bammei tei how lana, kamei patna hei tei kachaic nei khou raclou the.
23 Khoutei Shem lev Japhet rui phey laana kaney bou khou goulouna, namthei tangsynna pheykai khou tei gutna kapu khou phey tei hwamlou the kumna kaney zaw tei namthei karihna kapu paliuc bammei tei kaney how kan mak ge.
24 Kamei mphaengv pat dat khou kanac alaucmeipu rui sw bammei tei thay lana
25 kamei rui kumna sa the,
“Kanaan hei syang phungc kandi tho! kamei hei kachana nunc bangc sw puni the.
26 Kamei rui kumna ni sa e,
Shem tuang Racguangc Ringhpouc ta thuanc o! kumna Kanaan hei kabangc sw kandiu.
27 Ravguangc rui Japhet ta tikingckiuclou diu! Kakikta guay tei Shemmei nunc lev lungc bam kan diu! Kanaan hei Japhet bangc sw puni.”
28 Duidai tangv Nouha tingkwm 350 lungclou datna 29 katingkwm 950 khou kamei theic kan the.
Genesis 8
THAUREYMEI 8
Duidai Luailoumei
1 Nouha khatni kamei lev hidai lungc khou bammei khouringh khounah katana ta tei Ravguangc amuc mak ge, kamei rui mpwan ti-aliulou tina dui tei thip key kahouh dat the.
2 Kandih bangc tuang duipuakkai guay khatni tingpuk tuang kaimun guay thingc kan the, kumna ting key nthaekc kan the.
3 Kumna khith khitna dui tei zaeng 150 lungc khou thip key dat the.
4 Bw chaneimei tuang zaeng 17mei nungc hidai tei Ararat chyng dai khou nthaekc key the.
5 Dui tei khith khit keyna, bw ruhmei tuang reymei tingmik nungc chyng twan guay how pat dat the.
6 Zaeng 49 tangv Nouha rui kailat akhat laancpatna
7 agaekc akhat mpat pat the. Hei tei guang dat makna dui tei thip key kan mak saanv samckey samcngangh bam kan the.
8 Dui tei thip the ny twmei zauh khang Nouha rui aphyna akhat mpat pat the,
9 tiki dui rui kandih kapwm tei chungc padik bam tina, aphyna tei tow keyloumei bamv maekna hidai khou tei hanc guang dat the, kumna Nouha rui kabaanc haamvpatna laalou dat the.
10 Kamei zaeng chanei nkhwan dat lana aphina tei mpat pat dat the.
11 Aphyna tei laengkicchy ringcrih rimei kamwang khou mbamhna tingzyn guang dat the. Dui tei thip key dat tina the twmei Nouha thay the.
12 Mi tangv tei zaeng chanei bam datna aphyna tei mpat pat dat re; kumna hei tei hanc guang dat mak khe.
13 Nouha katingkwm 601 kwm reymei bw tuang reymei tingmik nungc dui tei thip key dat the. Nouha rui hidai gwm tei laanc patna zauc kari pwki, kandih tei kangc dat bammei ta how the.
14 Kaneimei bw tuang 27mei nungc kandih tei phui thiu dat the.
15 Ravguangc rui Nouha khou sa the,
16 “Nang now, nang nac nunc khatni kaniw now nunc ta nduanghna hidai khou rui pat dat tho.
17 Nruay thauruay khatni khouringh khounah kabung rui tuihmei khouringc kaguayna kingckiuc patna kandih pwm zinlik pat khang mi guay tei kaw pat dat tho.”
18 Kumna Nouha tei kanow, kanac nunc khatni kaniw now nunc ta nduanghna hidai khou tei rui pat dat the.
19 Khouringh khounah khatni nruay thauruay guay tei kazaat kazaat swna lwan pat dat the.
Nouha rui Khaengmei
20 Nouha rui Ringhpouc khang ravchabamv akhat kasiamh thauna nthanmei khouringc khatni nruay thauruay kazaat kathuic khou rui akhat khat laana kapumc pwm rawna Ringhpouc khang khaengna kat the.
21 Rawna khaengmei rym tei rui Ringhpouc ta tikimlou pwkhou, kamei rui kumna ning the, “Maansei lung hei alauc khou rui thauna si bam sini maansei zaeng rui ai kandih ta siang dat lak khe. Ntaw ai rui sw kanmei kumcna ai kalung parik kaguayna ta swmaan dat lak khe.
22 Kandih nai bam saanv lingckeypui ganv khatni taypui ganv nai puni. Lumhmei nchumei, tingsei tinglwm, zingbangc kalaanv nai bam puni.”
Genesis 7
THAUREYMEI (GENESIS) CHAPTER 7
Duidai
1 Ringhpouc rui Nouha khou sa the, “Nang kai kaikhunc kapwm ta nduanghna hidai khou tei gut tho; kandih nam ruc khou mi kin khou nchumhna tat bammei ta ariwmei kiu nang na di the.
2 Nthanmei khouringc rui kazaat kathuic tuang kakui kaduic chanei chanei, khatni nthan makmei khouringh kazaat kathuic tuang kakui kaduic akhat akhat laaguang tho.
3 Nruay thauruay ni kazaat kathuic tuang kakui kaduic chanei chanei laaguang tho. Khouringh khounah, nruay thauruay kakik kata nai dat khang mi hei taanc tho.
4 Ai rui damcloumei kalung parik katana ta swmaan khang aseic khou rui thauna zaeng chanei tangv zingbangc 40 kalaanv 40 ting tiriu puni the.”
5 Ringhpouc rui samei kaguayna Nouha rui taanc the.
6 Kandih dui thummei tei Nouha katingkwm 600mei kwm the.
7 Duidai khou tei rui duak khang Nouha tei kanow kanac nunc khatni kanac nunc now nunc ta nduanghna hidai khou tei gut the.
8 Nthanmei, nthanmakmei khouringh nunc nruay thauruay kakui kaduic khatni kandih khou kabung rui tuihmei khouringh zaat kathuic,
9 Nouha lev twna hidai lungc khou tei Ravguangc rui latdanv tiiloumei theilayna gut the.
10 Zaeng chanei tangv duidai kiu guang the.
11 Nouha tingkwm 600 tuang kaneimei bw tuang zaeng 17mei nungc kandih bangc thangc naimei duidai duipuakkai guay puak phak the, tingpuk tuang duidai kaimun guay laancpat the,
12 kandih khou kalaanv 40 zingbangc 40 ting riu the.
13 Mi nungc kahak tei Nouha kanow, kanac gaanv thumh Shem, Ham, Japhet khatni kaniw now nunc lev twna hidai khou tei gut the.
14 Kaniw tei lev khouringh zaat guay, kai kiruai khatni nwm khouringc, nthyammei daihmei, nruay thauruay zaat katana gut the.
15 Nouha lev twna kalung parik kazaat katana kakui kaduic kanei kanei hidai khou tei
16 Ravguangc rui latdanv tiiloumei theilayna kazaat kaguayna gut the. Nouha tei gut kan pwkhou Ringhpouc rui kaikhamv tei mbangh kan the.
17 Dui tei zaeng 40 daic the, kumna hidai tei kandih nam ruc khou rui kauhsihna phuangc the.
18 Dui tei thum thau the, hidai tei dui ruc khou phuangc thau the.
19 Dui tei heidikamv chungc kauh thau the, kumna kauh liangmei chyngbut guay nganv thumliam thau the.
20 Dui tei daic khith khit thauna chyng twan khou rui chowbuk 15 daic twan ku the.
21 Kandih khou naimei ringhmei katana nruay thauruay, khouringh khounah, khatni maansei katana theic the.
22 Kandih khou naimei kathiu laa mei khouringh katana theic the.
23 Kandih nam ruc khou naimei ringhmei katana maansei, khouringh khounah, nruay thauruay katana swmaan the. Nsaekcloumei twmei kiu Nouha lev twna hidai khou gutmei nunc na tei di the.
24 Zaeng 150 dui tei kandih ta thumlou the.
Genesis 6
THAUREYMEI (GENESIS) CHAPTER 6
Maansei Ramsi
1 Maansei kandih nam ruc khou zinlik patna aluh nunc lungc pat geic pwkhou,
2 Ravnac nunc rui mi aluh nunc lwnchav gaymei tei how lana, kaniw rui kahaw hawmei ta kaw laa the.
3 Khoutei Ringhpouc rui sa the, “Ai rui tiiloumei bumaengc hei maansei khou tingsaengna tibam lak khe; maansei hei theic kan nimei tuang di the. Ntaw khou rui thauna kaniw tingkwm 120 ringc twan lak khe.”
4 Mi douc tei khatni katangv thangc nganvna maansei lev ravnac nunc kariumei nac liangtuangh nunc kandih khou chapat geic khwan e. Kaniw tei reynungc lungcloumei liangtuangh daihmei nunc khatni kazanc dinhmei nunc tei the.
5 Kandih khou lungc bammei maansei katana hei adihkamv si cho khatni adih simei lungning kakhanhna bam tu cho twmei Ringhpouc rui how pwkhou,
6 kamei rui kaniw ta damclouna kandih khou tilungcloumei khang hei kalung kabiu the. Kamei kalung bakna
7 kumna sa the, “Ai rui damcloumei maansei ti hei khouringh khounah, nruay thauruay guay ta kazauhna ai rui swmaan dat puni the, kalam thu ai rui kaniw ta damcloumei khang hei ai neihla mak khe.”
8 Tiki Nouha ta thu Ringhpouc rui kalung kwnlou e.
Nouha
9 Mi hei Nouha tuang pary e, Nouha hei ravchap tatmeipu khatni kakin khou kakhuay maekmei kiu karana khwan e. Kamei Ravguangc lev tat nchamcna lungc khwan e
10 Nouha hei nah mpouh gaanv thumh Shem, Ham khatni Japhet nai khwan e.
11 Tiki Ravguangc mikzaw khou meic baihmei guay thu si ngam khwan the, kumna kabamv kathuic khou meicngam meicliammei taanv rui padik bam khwan e.
12 Ravguangc rui kandih ta zauc pwkhou mphuam ngam the kalam thu meic nunc tei simei panty khou lungc bam khwan e.
13 Ravguangc rui Nouha khou sa the, “Maansei kaguayna ta swmaan ni the twna alung ding the. Kalam thu kandih hei kaniw tuang meicngam meicliammei taanv rui padik the, kaniw zaeng rui mi kandic ta lev kaniw kaguayna ta swmutsutlou puni the.
14 Nang khang saipres thing rui hidai akhat kasiamh tho. Mi khou tei kailangv kailangv daengclangclou o kumna hei tei kalungc kapaengc khi rui kowliam kaluaklou o
15 Hei tei kasaeng kadai rui chowbuk 300 saenghmei, chowbuk 50 daihmei khatni chowbuk 30 kauhmei nina e.
16 Hei tei kagaeng ku nganvmei khou rui chowbuk akhat ku datna khup nina e. Hidai tei kathaek kathumh sw o. Kumna kanaek khou kaikhamv lou o.
17 Kalung parik kaguayna ta swmaan khang ai rui duidai kandih khou tiguang puni the. Kandih khou naimei ramh katana theic puni the,
18 tiki ai rui nang lev latdyng laa puni e. Nang thu nang now nang nac khatni kaniw now guay lev hidai khou gut ro.
19 Hih lungc khou tei khouringh khounah kazaat kathuic tuang kanei kanei laa gutlou o, hei tei rui kaniw theih makna nangniw daeng khou bam khang e. Kaniw tei kakui khatni kaduic nina e.
20 Nruay thauruay pwni kazaat theilayna khouringh khounah pwni kazaat theilayna, nrui pwni kazaat theilayna kanei kanei laa gutlou o kaniw zaat maan mak khang e.
21 Kum lana tu nuhmei taektw guay kazaat ntanghna laa gutna peiclou o, hei tei nangniw khang ni khouringh khounah guay khang ni e.”
Genesis 5
THAUREYMEI (GENESIS) CHAPTER 5
Adam Kikta
1 Mi hei Adam kikta chak keymei lwan the. (Ravguangc rui maansei kasiamh khou kata luicna damclou the.
2 Kamei rui ntumei khatni nggaanvmei swna damclouna, kaney ta suaihiamlou the, kumna kaney ta "Maansei" twna kaw the.)
3 Adam kamei tingkwm 130 tangc pwkhou kamei kumhmei nah mpouh akhat lungc guang the, kumna kazanc Set twna kaw the.
4 Mi tangv tei, Adam tei tingkwm 800 lungclou dat re. Kanac mpouh aluh baih baihmei ni puanclou e,
5 kumna katingkwm 930 khou kamei theic kan the.
6 Set tei katingkwm 105 tangc pwkhou nah mpouh akhat, Enos ta puanclou e;
7 mi tangv tei tingkwm 807 lungclou dat re. Kamei mpouh aluh baih baihmei ni puanclou datna
8 katingkwm 912 khou kamei theic kan the.
9 Enos tei katingkwm 90 khou nah mpouh akhat, Kenan ta puanclou e,
10 kumna mi tangv tei tingkwm 815 lungclou dat re. Kamei mpouh aluh baih baihmei ni puanclouna
11 katingkwm 905 khou kamei theic kan the.
12 Kenan tei katingkwm 70 tangc pwkhou kanac mpouh gaanv khat Mahalalel ta puanclou e.
13 Mi tangv tei kamei tingkwm 840 lungclou dat re. Kanac mpouh aluh baih baihmei ni puanclouna
14 katingkwm 910 khou kamei theic kan the.
15 Mahalalel tei katingkwm 65 khou nah mpouh akhat Jared ta puanclou e.
16 Mi tangv tei tingkwm 830 lungclou dat re. Kamei mpouh aluh baih baihmei ni puanclouna
17 katingkwm 895 khou kamei theic kan the.
18 Jared tei katingkwm 162 khou nah mpouh akhat Enok ta puanclou e.
19 Mi tangv tei tingkwm 800 lungclou dat re. Kamei mpouh aluh baih baihmei ni puanclouna
20 Katingkwm 962 khou kamei theic kan the.
21 Enok tei katingkwm 65 tangc pwkhou nah mpouh akhat, Methusela ta puanclou e.
22 Mi tangv tei rui Enok Ravguangc lev lamluaina tingkwm 300 lungclou dat re, kumna mpouh aluh baih baihmei ni puanclou e.
Genesis 4
THAUREYMEI (GENESIS) CHAPTER 4
Kain lev Abel
1 Adam kanow ta thaylou the, kumna kanow kapumc nritna nah mpouh akhat puanc the. "Ringhpouc paan rui anac mpouh akhat nai the," twna kamei rui kazanc khang Kain twna phuaklou the.
2 Kanac mpouh akhat, Abel ni puanc dat re. Abel tei lauziu nruaihmei, khatni Kain rui lautaanhmei sw the.
3 Kaganv kanakmei tangv Kain tei katuang phunling laaguangna Ringhpouc khang kat the.
4 Abel thu kalauziu pang khou puancreymei lauziunac laaguangna swluai the, kumna mi tuang gayliang liangmei saram guay tei kat the. Ringhpouc rui Abel ta khatni katuang puatkat ta pianlou the,
5 tiki Kain khatni katuang puatkat ta thu laa lou mak khe. Kain tei kalungpuamc the khatni kazaw zingc the.
6 Khoutei Ringhpouc rui Kain khou sa the, "Tabui swna nang lungpuamc bam tu cho? Tabui swna nang zaw zingc bam tu cho?
7 Nang rui kat chuyna kat tina laa lou pu lak ge twna cho? Tiki nang rui nchumh makmei taanc tipui zaeng rui paapc tei nang tuang kaimun khou nchwanna bam the. Hei tei rui nang ta sin khang sw bam the, tiki nang mi ta tei ngam nina de."
8 Kain rui kakainac Abel ta "Laupuk thangc pat kho" twna kaw the. Kaney laupuk khou bam khou Kain rui kakainac Abel ruc khou baanh keyna swluai the.
9 Khoutei "Nang kainac Abel tabui thangc bam cho?" twna Ringhpouc rui Kain khou thanv the. "Ai thay mak ge; ai akainac ta zauc bammeipu dina cho?" twna kamei rui daw the. 10 Khoutei Ringhpouc rui kumna sa the, "Tabui swna nang hei kumhmei taanv hei taanh tu cho?” Nang kainac zei tei rui kandih khou rui akhou kauc ku bam the.
11 "Ntaw thu nang ta sianglou the khatni kamwang hah patna nang kainac zei tei nang baanc khou rui nzuh kanmei kandic khou rui nang ta alay pat the.
12 Nang rui phunling lingc key bam sini, kandih rui ramhkhat na sini ti-nthai pu lak khe; nang kandih nam ruc khou kakai kalau maekna ruan tatmei sw puni the."
13 Kain rui Ringhpouc khou daw e, "Mi dandi hei phungc ngam lak ge.
14 Nang rui ata kandih khou rui khatni nang hu khou rui nthau pat the, ai hei kakai kalau maekna kandih khou ruan tat bam puni the, khatni ata ariw riwmei rui ata swluai puni the."
15 Tiki Ringhpouc rui daw the, "Kiuc hamh e, thowkumhmei rui nang ta swluai e thei kata kiuc kadam chanei khwm khangc puni." Kumna ariw riwmei rui swluai mak khang Ringhpouc rui Kain khou madanclou the.
16 Kumna Kain tei Ringhpouc pamv khou rui tatpat lana Eden neihpat biak thangc naimei "Nod" twna kawmei kandic thangc lungc tat kan the.
Kain Keikik
17 Kain rui kanow ta thaylouna nah mpouh akhat puanc the, kumna kazanc Enok twna phuaklou the. Kain rui kaidai akhat kasiamh thauna hei tei Enok zanc khou phuaklou the.
18 Enok rui Irat puanc e, Irat hei Mehujael pu e, khatni Mehujael hei Methusael pu e, Methusael hei Lamek pu e.
19 Lamek kanow kanei e, kaney zanc tei Ada lev Zilla e.
20 Ada rui Jabal puanc e, kamei hei khouringh nruaihna pheykai khou lungc tat bammei nunc pupouc e.
21 Kakainac rui Jabal e, kamei hei nrah alim downa lusuanmei nunc pupouc tei e.
22 Zilla rui Tubal Kain ta puanc e, kamei hei tanzinc lev ntanh tuang baansin kasiamhmei nunc pupouc e. Tubal Kain kainacpui hei Naama e.
23 Lamek rui kanow nei khou sa the,
"Ada lev Zilla nangney nking o:
ata chabwan gaanv khat rui baina swzamloupui zaeng rui kata swluailou kan the.
24 Kain ta swluaimei khwm kadam chanei khangc e thei,
ata swluaimei ta thu kadam 77 khangc puni."
Set lev Enos
25 Adam kai nowpucnei khou mpouh akhat tiilou dat re. "Kain rui swluai kanmei Abel phaan Ravguangc rui akhou nah mpouh akhat tiilou dat the," twna kamei rui kazanc tei Set twna phuaklou the.
26 Set kanac mpouh gaanv khat puanc the, kazanc Enos twna phuaklou the. Mi ganv khou tei rui maansei rui Ringhpouc zanc saancna kalum thau khwan the.
